COVALIMA, 10 janeiru 2020 (TATOLI) – Eskola Ensinu Sekundáriu Jerál Públika (ESGP) Suai, durante ne’e fo apoiu bee moos ba familia uma-kain 100 resin husi aldeia Serankotek no aldeia Talioan suku Oges. Maske nune’e kada fulan uma-kain sira ne’e kontribui verba $2 ba parte Eskola.
Diretór Eskola ESGP Suai, Franselino Freitas de Carvalho hateten, akordu dolar rua kada fulan ne’ebé uma-kain 100 husi aldeia rua kontribui ba eskola ne’e atu bele halo fali manutensaun ba makina karik hetan avaria.
“Ami halo akordu ne’e sira konkorda. Agora osan kontribuisaun dolar rua ne’e fahe ba kategoria rua. Dolar ida prevee atu halo manutensaun ba makina kuandu avaria no dolar ida ba sosa kanu no torneira sira kuandu aat,” Diretór Franselino Freitas de Carvalho informa ba jornalista sira iha aredór Eskola ESGP Suai, ohin.
Nia dehan, fornesementu bee moos ba komunidade tuir oráriu kada semana dala tolu de’it. Razaun apoiu bee moos ba sira ne’e tanba, tuir diretór ne’e katak komunidade mak durante ne’e fó apoiu ba eskola ninia progresividade. Tanba ne’e, sira husu apoiu ba parte eskola mós labele taka matan.
“Durante ne’e parte eskola moris ho kontribuisaun inan-aman sira nian. Maibé, atu fó gratuita ne’e difisil uitoan. Entaun presiza hetan apoiu nafatin atu nune’e bele ezerse di’ak liután fasilidade sira ne’e”.
Iha parte seluk, Reprezentante uma-kain husi Aldeia Talioan no Serankote, Graciana Amaral haktuir katak antes ne’e sira asesu bee mos dok husi hela fatin. Sira la’o ain kilometru lima hodi hetan bee moos maibé depois Eskola ESGP oferese apoiu bee moos husi ProFilips Austrália sira mós hakbesik aan ba parte eskola atu hetan apoiu.
Agora laiha ona problema tanba iha akordu entre eskola ho komunidade. Ne’eduni kada uma-kain iha kontribuisaun ba eskola.
Entertantu, osan sira ne’e parte eskola liuhusi fundu bee no saneamentu mak sei jere hodi kontrola fali makina sira kuandu aat halo kedan manutensaun. Enkuantu, aldeia rua-Aldeia Serankotek kuaze 60 itál uma-kain no Aldeia Talioan 50 uma-kain.
Bee moos ne’e hetan apoiu husi sentru komunidade Covalima ne’ebé suporta husi profilips Austrália.
Jornalista : Tomé Amado
Editór : Rafy Belo
Fontes : http://www.tatoli.tl/2020/01/10/eskola-esgp-suai-apoiu-bee-moos-ba-komunidade/
